ထီးလှိုင်ရှင် ကျန်စစ်သားမင်းကြီး၏ အတ္ထုပ္ပတ္တိ

ကျန်စစ်သားမင်း၏ရုပ်တု

ပုဂံခေတ်တွင် အနော်ရထာမင်းသည် ပုဂံကျောက်ဆည်တဝိုက် အနေမှ ယခုပြည်ထောင်စုမြန်မာနိုင်ငံတော် အနေနီးပါးအထိ ကျယ်ဝန်းလာအောင် နိုင်ငံတော်သစ်ကို တည်တော်မူခဲ့သည် မှန်သော်လည်း ထိုမင်း နတ်ရွာစံပြီးနောက် နိုင်ငံသစ်ကို တည်တံ့ခိုင်မြဲအောင် ဆက်လက်ဆောင်ရွက်နိုင်သူမှာ ထီးလှိုင်ရှင် ကျန်စစ်သားမင်းပင် ဖြစ်ပါသည်။

ကျန်စစ်သာမင်းကြီးသည် ခမည်းတော်မှာ အနော်ရထာမင်းနှင့် မိခင်မှာ ပဉ္စကလျာဏီ မင်းသမီးတို့ ဖြစ်ကြသည်။ ရာဇဝင်အချို့တွင် အနော်ရထာမင်းက မင်းလောင်းပေါ်သည်ဟု ဟူရာဖြူ၊ ဟူရာညိုတို့က လျောက်ထားရာ နန်းအရာကို လုယူမည့်သူဟု အထင်ရှိသဖြင့် အသက်အရွယ်အလိုက် ကွပ်မျက်ခဲ့သည်ဟု ဆိုကြသည်။ ထိုမင်းလောင်းမှာ အနော်ရထာမင်းလက်ထက်တွင် မဟုတ်ဘဲ သားတော်၏နောက်မှ ဖြစ်ပေါ်လာမည့် မင်းဖြစ်ကြောင်း ပြန်လည်လျှောက်တင်ကြသဖြင့် မင်းကြီးသည် နှလုံးမသာမယာဖြစ်ရ၍ ရဟန်းတော်များကို နန်းတော်၌ ဆွမ်းကပ်လှူခဲ့သည်။ ရဟန်းတော်များကို ရေကပ်လှူစဉ် မင်းလောင်း၏ အာခေါင်မှ အရောင်ထွန်းလင်းတောက်ပနေသည်ကို တွေ့ရသဖြင့် အဆိုပါ ရဟန်းပျိုကို လူထွက်ပြီး ကျန်စစ်သား ဟူသော ဘွဲ့ချီးမြှင့်၍ ငထွေရူး၊ ငလုံးလက်ဖယ်၊ ညောင်ဦးဖီးတို့နှင့်အတူ အနော်ရထာမင်းကြီး၏ အပါးတွင် ခံစားစေသည်ဟု ရာဇဝင် အချို့တွင် ဆိုကြသည်။